KALYO

Meron ka ba nito?

Eto ang pambungad kong tanong sa inyo sa buwan ng Hulyo. Matapos ang ilang araw na rin na pagsubaybay sa mga kaganapan sa Pilipinas, sa pinsala na dala ng bagyong Frank (ang sosyal ng pangalan, tunog matanda), hanggang sa pagkapanalo ni Pacman, di ko pa rin maiiwasan ang makadama ng awa at maisip ang mga naiwang pamilya ko sa Pilipinas. Kelan kaya lahat ito matatapos? O may katapusan kaya ito? Buti na lang on the lighter side e, naandyan si Bugoy ng Pinoy Dream Academy. Kahit papano e may pambawi ang mga balita.

At ano naman ang kinalaman ng kalyo sa mga sinasabi kong ito? Ewan ko pero ang alam ko lahat tayo meron nito.

Kasabihan sa probinsya namin na malalaman daw kung ano ang trabaho ng isang tao sa pamamagitan ng mga kalyo nito sa kamay. The more na makapal ang mga kalyo, masasabing mas masipag sa daw buhay ang isang tao. Syempre, malalaman mo ito kung kakamayan mo ang isang tao. Dahil sa ganitong kasabihan, 'di ko alintana noon kahit makapal na ang kamay ko. Alam ko medyo may pagka-unfair etong kasabihan na ito kasi papaano naman kung sa propesyon mo ay hindi mo kailangang humawak ng araro, martilyo, lubid, sagwan, pala, sa halip papel at ballpen. Pero, pwede ka ring kalyuhin sa kapepitiks lang a. Maghapong finger-an.

Sabi ko nga, minsan din akong nangarap at nagsikap para hindi ako hahawak ng araro, lubid, martilyo, pala at kung anu-ano pang nakakapagpakapal ng tisuyin kong mga kamay. Pero ngayon ko mas narealize ang value ng mga taong may ganitong trabaho. Sa dinanas na delubyo ng Pilipinas ngayon, papano na lang kaya kung walang mga taong gustong tumulong doon sa mga kababayan nilang apektado ng kalamidad, kung walang taong lulusong sa putik para maghatid ng kahit man lang kaunting tulong, kung walang gustong sumisid sa dagat para sa ikalalakas ng mga taong naghahanap ng pag-asa. Paano na lang kung ang lahat ng tao sa kabila ng mga pangyayari ay mistulang walang pakiramdam at walang pakialam? Siguro lalangawin din ang laban ni Manny Pacquiao. Pero, kasi likas sa ating mga Pilipino at pagiging matulungin at may malasakit sa kapwa. Dapat ko bang isali ang mga maeepal na pulitiko?

Masipag daw ang taong kalyuhin ang mga kamay. HIndi lamang mga magsasaka, mangingisda, construction workers ang tinutukoy ko. Syempre, 'yong mga taong nagsisikap, naghihirap at walang sawang kumakayod sa pagnanais na maiangat ang estado ng buhay ng pamilya at 'yong mga taong nagsasakripisyo para sa iba. Pero kung kalyo mo ay may kasamang amoy, aba'y ibang usapan na yan. Ibig sabihin, gastos na yan.

Sa mga tulad kong kalyuhin ang mga kamay, wag kayong mahihiya. Pero kung di n'yo na kaya aba'y problema n'yo na yan.